赤口同情人節已過
年初四未洗返工，就梗係出去郊外玩返轉
是日結伴同行到東龍島一趟（筆者第二次到訪）
上一次只係行鹿頸灣，一訪荒棄既直升機坪，時間關係要提早完結行程
今次到訪，11點多就可以開始，基於同行伙伴既一句"玩大佢"
就開始我地既環島遊
 是日天朗氣清，風和日麗，萬里無雲當然要同親愛的陽光玩遊戲
 過左觀景台，就向鹿頸灣出發，感受下咩野係世外桃源 

經過石灘，就好似去左澳洲一樣，水清山幽，配埋咁靚既藍天，無得輸同行者個個睇到哇哇聲，個個都話似去左外國咁
 咁過得黎，就梗係要打返張卡先啦，CHECK！ 

向上行到荒廢左既直升機坪隔離可以望到咩叫一望無際，畏高者就唔好行咁出

接下來鑑於所有同行既團友畏高同怕落崖
筆者唯有自己一支箭衝落去是日最想到既打卡位 - 『白崖』
 

由於沒有正式路線，想到此位置請自行量力，畢竟落去同上返去都係全攀爬而且要注意白崖既岩石係有灰粉係上面
特別容易跣到，所以一對富抓地力既行山鞋相當重要！！！！！

 點影都咁靚
 
筆者用左約略10-15分鐘上落白崖兼打埋卡之後，就開始我地既"玩大佢環島遊"
咁就去返往鹿頸灣同南堂碼頭既一個交叉位，往上山方向走

 沿路一直向上斜住上，體力少D都唔得 

上到百多米高都有另一個打卡位可以影到呢個咁靚既風景，亦有人係呢個位置紮營 

咁既高度仲有咁既仙境可以睇
及後一路向東龍洲炮台方向走
山徑都唔係石屎路，個個同行既行到嗌中伏
去到落山位置，對新手黎講都頗斜同驚險，所以要決定環島遊既要有心理準備
而且泥土有D鬆散，易跣，坐住落既話就至安全

落到山就相對地簡單，亦有士多俾遊客飲飲食食

夠鐘就行返去碼頭等上船
由於假期關係，早D排隊先確保有船搭，請自行管理時間

玩到日落，完滿結束

是次環島遊，並無白捱！